我最鍾意訓覺同食野。
一日24小時, 我用左最少20小時黎訓, 其他時間就係發呆同不停食野‧
我好享受訓覺, 每次都訓到放鬆晒, 姐姐形容好似俾架truck撞倒, 案發現場既事主一樣。(真係大吉利事過佢!)
我又俾屋企既狗仔隊偷影左我既睡姿, 姐姐重提意嚴三將d相畫到好似CSI甘, 真係俾佢激死。
5月開始, 不停睇醫生, 一時手腳疼痛, 冇晒心機, 一時又因食左消炎藥既副作用而痾血, 到一齊好似回復返正常, 開心過後, 又突然周身唔舒服, 行步路都痛。
上星期六我冇晒心機, 姐姐哥哥觀察左我兩日, 決定都係要睇醫生, 因為姐姐覺得我唔係太嚴重, 唔想要全身麻醉做磁力共震, 所以, 我地先去睇家庭醫生。
家庭醫生建議我照x-光, 只須要打鎮定劑就可以。 結果係我由尾龍骨尾段向上3,4節有骨刺, 骨刺帶來既痛令我雙腳唔想用力去行, 而所有力都集中係兩肩同前腳, 所以, 傷左肩膀既肌肉。由今個星期起, 我要連續4星期到醫生處打一支針加強關節之間的gel, 姐姐叫個支做狗狗W40, 跟住每半年一支, 其實都係治標既方法, 醫生話要我安靜d, 即唔好四圍走,所以, 我依家既走動範圍都係個欄入面, 唔可以好似以前甘成間屋走來走去。
我係唔開心, 但我自己知自己事, 我都好合作係個欄度訓覺同發吽豆,我會好好休息, 快d好返, 又可以去街啦!
